دا انتوا كده بلابيص

فاجأني بالكلام و هو داخل و في ايده فنجان قهوة:

• "انت بجد بجد مصدق نفسك؟"

• "موش فاهم قصدك ايه…"

• "انا قريت امبارح في اللي بتقولوا عليه انجيل، و طلع حكاية بيحكيها اربع اشخاص و مختلفين فيها كمان و بعدين… و بعدين فين الله عز وجل في القصة دي ؟ الله ما قالش جملة واحده على بعضها … فين يابني كلام ربنا اللي عندكم؟ كله كأنه سيرة عيسى النبي وكلامه… بس… انتم بعييييد بعييييد خالص و مافيش منطق بالمرة…"

• "طيب وعجبك الكلام اللي قاله النبي عيسى؟"

• "بص عشان اكون امين معاك هو فيه حاجات كويسه و ماشيه مع الانسانية و الاخلاق عموماً و ده اللي بيعجب الناس… النبي عيسى في الانجيل بتاعكم كأنه فيلسوف و بيدي نصايح للناس تحب بعضها و حاجات كده كويسه بس ملبسكم في الحيط وش ومسلِّمكم تسليم اهالي للناس كلها…"

• "موش فاهم دي… يعني ايه مسلمنا تسليم اهالي؟"

• "عاملكم ملطشة… انا لو اعرف ان الكلام ده عندكم من زمان كنت ظبطتك و كله من عندكم…"

• "موش فاهم برضه…"

• "احبوا اعدائكم"… "ماشي دي غريبه شوية و غير قابلة للتطبيق غالباً . بس ممكن نفهمها في إطار ان عدوي هو انسان زيي و قوانين الحروب و حاجات كويسة زي ما عمل صلاح الدين مع ريتشارد … ماشي… انما خد عندك حاجه كده بتقول اللي يضربك على خدك اليمين، اديله الخد التاني يضرب، و اللي ياخد منك المعطف باين ولا الشال، ادي له الجلابية و طبعاً لو انت عملت كده هاتبقى بلبوص لامؤاخذه … فين يابني الحق و العدل و القانون ؟ فين حقوق الانسان؟ واحد يهينني و ياخد هدومي و اقول له اتفضل؟ احمدوا ربنا ان احنا مسلمين بنخاف ربنا كان زماننا مشيناكم بلابيص و كله من عندكم… ازاي تقبلوا ؟ و اصلاً ازاي تقدروا تنفذوا الانبطاح ده؟… ربنا عادل يابني مايقبلش البلبصة…"

و ضحك بصوت عالي بعدين قالي:

" No Offence

ماقصدش اتريق. انا قصدي اوضَّح ان الكلام موش منطقي …"

اتفاجئت بصراحة بالتحليل ده و فهمت وجهة نظره بعدين قولت له:

"الحكمة هنا ببساطة انك تقبل الاهانة بسماحة نفس و ماتنتقمش لنفسك و تسيب ربنا يتصرف. الحكمة دي مستخبية و عشان تشوفها لازم تبقى عاوز تشوفها، انما لو بتتكلم على التنفيذ انا هاسألك سؤال: تفتكر السيد المسيح او النبي عيسى عمل الكلام اللي طلب مننا نعمله؟"

بص لي بحسم و قال:

"حسب القصة بتاعتكم هو في الآخر اتعلق عريان على خشبة استغفر الله العظيم."

قلت له: "يبقى نفذ اللي قال عليه. صح؟"

قال لي: "أيوه."

قلت: "إحنا بنعمل زيُّه. و بالتدريج بنبقى شبهُه او هو بيظهر فينا، يعني فيه حاجه بتتغير جوه الناس عشان تقدر تعمل كده لو فاهم قصدي…"

قال: "طب و العدل و الحق ازاي يحصلوا بالطريقة دي؟"

قلت: "زي ما العدل و الحق حصل في نفس القصة اللي قريتها."

ابتسم ابتسامة خفيفة كده وقال: "قصة ان النبي عيسى قام من الموت دي برضه مالهاش دليل."

قلت: "لو ماكانش قام ماكنتش تلاقي مسيحي تكلمه اليومين دول. ماحدش يقبل الموت على صليب إلا لو كان فيه قيامة. انت ممكن تقبل الموت و انت بتحارب، الموت و انت بتشتغل، او الموت في بيتك وسط حبايبك او عشان حبايبك. انما تقبل الموت بفرح و حب لقاتليك و انت كمان متهان بس عشان مسيحي؟ ازاي ممكن تقبل لو مافيش قيامة، لو موش فيك المسيح الحي ؟"

"ما تستعجلش هاتقوم و هاتتظبط في الآخرة زي ما بتتظبط في الدنيا يا صديقي… انتوا مجانين؟! ربنا يهدي…" قالها وهو ماشي…

Photo found on Wix