"عملتوا ايه؟ عملنا عزومة…"

قالوا له: يا أستاذنا خلي الناس تروَّح بقى، الوقت أتأخر و احنا بعيد عن العمار و مافيش مكان قريب يجيبوا منه اكل و لا شرب…

قال لهم: "ادوهم انتم ياكلوا … شوفوا كده معاكم اكل قد ايه ؟"

دوروا معاهم و سألوا بعض لو حد معاه اكل عشان بس يجاوبوا على سؤال الاستاذ… الحقيقة يعني حتى لو واحد ولا اتنين معاهم اكل… ايه الاكل ده بالنسبة للناس دي كلها؟

دوَّروا و جمعوا كل الاكل اللي معاهم و حطوه قصاد الاستاذ و اتشجع واحد وقال: ماعندناش غير خمس ترغفة عيش و سمكتين بالعدد …

بعدين قال بتردد: ممكن نروح احنا نشتري للناس دي كلها اكل و نجيبه لغاية هنا…

واحد تاني سامع قال: نشتري اكل للناس دي كلها؟ دول ييجوا خمس تلاف نفر غير الستات و العيال الصغيرة… نروح نشتري اكل لكل دول و نيجي؟ نتقسم مجموعات و كل مجموعة تشتري اكل لألف واحد من البياعين اللي حوالينا…. الواحد ممكن يشيل اكل خمسين او ميت نفر لو هانجيب لكل نفر رغيف و سمكاية ولا رغيف و ثمرة فاكهة او خضار …

قال لهم: طيب قعدوهم مجموعات كل خمسين مع بعض …

نقعدهم؟ مجموعات؟ حاضر حاضر يا استاذ…

ياللا يا جماعة بعد اذنكم كل خمسين واحد يتجمعوا مع بعض … اتفضل حضرتك مع المجموعة دي… و حضرتك هناك عند الشجرة… ارجوكي يا ست الكل لازم تختاري مجموعة و تقعدي معاهم ماحدش يقعد لوحده … فين بابا و ماما؟ روح يا حبيبي اقعد معاهم…

نقعدهم مجموعات؟ …. ايوه حاضر بنعمل كده اهوه …. بس ايه علاقة شكل القعدة و التقسيمة بالسؤال اللي احنا موش عارفين اجابته… نجيب اكل للناس دي كلها منين و ازاي؟

يمكن هانقعدهم و بعدين ناخد منهم الشباب يساعدونا نجيب اكل؟

نقعدهم و نلم منهم فلوس نروح نجيب اكل؟

نقعدهم و نقول لهم كل مجموعة تتصرف و تبعت مناديب يجيبوا لها اكل؟

نقعدهم مجموعات يهدوا و يرتاحوا و نقول لكل مجموعة تروح بالترتيب عشان ما نضايقش الناس اللي ساكنين حوالينا لما يشتروا اكل و هم مروحين؟ خمس تلاف بستاتهم و عيالهم موش قليلين يعني لما يتحركوا مع بعض … يعملوا قلق برضه…

نقعدهم بشكل منظم… و نمشي احنا في هدوء… و لما الناس تزهق هايمشوا لوحدهم كل واحد على بيته و يشتري و هو مروح و ياكل في بيته… ممكن برضه … احنا ماقلناش تعالوا كلوا… هم اللي جم ورانا يسمعوا كلام الاستاذ … الاستاذ خلص كلامه يبقى يروَّحوا بس بنظام… مجموعة … مجموعة …

القصة بالتفصيل في انجيل لوقا الاصحاح ٩…

الاستاذ يسأل: عندكم ايه؟

لو لم نحضر له كل ما عندنا …. كل ما عندنا… فلا اظن انه سيعمل شيئاً …

الاستاذ يطلب ان نعمل ما بوسعنا في يقين انه يوجد ما يكفي للجميع مع انه … مع انه نظرياً لا يوجد سوى ارغفة قليلة بالكاد تشبع فرداً او فردين على الاكثر…

الاستاذ لا يطلب لنا مائدة من السماء … الاستاذ يعمل بما يمكننا ان نقدمه …

Photo credit is unknown to the author