الحج كامل

الحج كامل عين اعيان البدرشين، مزارع موالح وفاكهة على مدد الشوف يرمح فيها الخيل مايجيب لها آخر.

مواشي وطيور مالهاش عدد، سرايا وسط الخَضار تمشي لها سبعة كيلو بعد نزلة الاقليمي. فاتح باب رزق لفلاحين و عمال ياما اشي بالشهر واشي باليومية.

الغنى والعز ده كله ومالوش غير ولدين: عبدالله الكبير وعيسى الصغير.

عبدالله ناصح بيدور فلوس ابوه، تجارة وشطارة من يومه، يشتغل ولا يهدى ولا يرتاح. من طلعة النجمة و النهار بطوله تشوفه بين الفلاحين والعمال بيشقى ويتعب ويخش السرايا آخر اليوم عالنوم وتاني يوم ع ده الحال.

يصبح عالحاج: بالإذن يابا الشغل كتير. كلم لنا المحافظ يمشي تصريح الزريبة القبلية.

يمسي عالحاج: الزريبة تمام وجيبت الدكتور تمم عالبهايم زي ما أمرت يابا. محتاج قرشين ابتدي المشروع اللي حكيت لك عنه.

يصبح و يمسي ويشتغل ويقبض ويشتغل ويصبح ويمسي ويشتغل ويقبض ويشتغل…

عيسى دلوعة ابوة… ينزل يشتغل ياخد الحاج معاه. علمني يابا اعملها ازاي… ايدك معايا يا حاج… احكي لي يابا عاوز اسمع كلامك الحلو… يتعب ويشقى و يوزع من خير ابوه عالناس… يرجع يسهر مع الحاج بالساعات و يصحى من الفجرية يفطر وينزل مع الحاج عالشغل…

الحاج يحب عيسى و يديله بالكوم… عيسى يمشي يوزع عالعمال والفلاحين و ابوه يقوله "يابني دي فلوسك" يرد "مانت خيرك مغرقني يابا موش عاوز حاجه من الدنيا غير اشوفك بخير"…

تمر السنين و عبدالله بنى عمارة ليه ولعياله في الغربية و اشترى اي فون حديث فيه واتساب و فيس و ماينساش ابداً الحاج عالواتس … لسه زي ما هو يصبح و يمسي وياخد ويشتغل وياخد ويشتغل…

عبدالله بيشتغل ويحوش ويبني، عيسى بيشتغل ولا حوش ولا بنى… عبدالله سافر و عيسى عايش في سراية ابوه…

⁃ يا حاج كامل فين عبدالله ماجاش ليه النهارده العيد؟

⁃ عبدالله مشغول عن الحاج بارض الحاج ومال الحاج وعمال وفلاحين الحاج… إمتى ترجع ياعبدالله لحضن الحج كامل؟

الصورة من موقع اليوم السابع للفنان صلاح السعدني